Hazrath Imam Muslim Ki Shahadat
4:35 pm
Chunanche, Ye Dono Makkar Hazrath Muslim Bin Aqeel Aur Inke Dono Farzando(N) Ko Intahayi Aezaaz-O-Ikaram Ke Sath Le Kar Qila Ki Taraf Rawana Huwe. Ibne Ziyyad Bad-Nihaad Ne Pehle Hi Se Apne Sipahiyo Ko Hukm De Rakha Tha Ke Nangi Talware Kheenche Khade Raho Aur Junhi Hazrath Muslim Qillah Ke Darwaze Me Dakhil Hoon Fouran Unhe Dhoke Se Qatal Kar Dalo. Chunanche,Bahot Se Shaqi Darwaze Ke Dono Janib Nangi Shamsheere Liye Khade The Aur Jaise Hi Hazrath Muslim Bin Aqeel Qila Ke Phatak Me Dakhil Huwe Saf’Fa'Ko Ne Achanak Aap Per Qatilana Hamla Kar Diya Aap Is Waqt Aayat Tilawat Farma Rahe The Aur Qabl Iske Ke Aap Apni Talwar Niyam Se Nikal Kar Hamla Farmaye Kisi Bad-Naseeb Ne Aisi Talwar Mari Ke Aap Shaheed Hogaye..
Phir Aap Ke Dono Sahabzado Ko Bhi Zalimo Ne Apni Tegh Sitam Se Shaheed Kar Diya Aur Aap Ke Meharbaan Mezban Haani Bin Urwah Ko Bhi Qatal Karke Suli Per Latka Diya Aur In Sab Shohda-E Keram Ke Saro Ko Nezo Per Chada Kar Kufa Ke Kucha-O-Bazar Me Phira Ker Khoob Khoob Apni Behayai-O-Shaqawat Aur Sang Dili-O- Mehman Kushi Ka Mazahira Kiya.
Kufawalon Ki Is Be-Ahdi Dagha-Bazi Aur Bewafayi Per Qiyamat Tak Aane Wali Nasle Insani Nafrat-O-Malamat Karti Rahegi Ke Aise Moaz'Ziz-O-Mohtaram Mehmaan Ko Jise Badi Badi Tamanna'O Aur ILteja'O Ke Sath 150 Arziya Bhej Kar Bulaya Aur Phir Uske Hath Per Bait Karke Uski Nusrat-O Himayat Ka Ahde-Mohkam Kiya Aur Phir Is Tarha Use Bekasi-O-Be-Basi Ke Aalam Me Khoonkhwar Dushmano Ke Hawale Kar Diya Ke Wo Aur Uske Nanhe Nanhe Bachhe In Kufiyo Ke Samne Tahe Tegh Kar Diye Gaye Aur Ye Behaya Beghairat Qoum In Mazlumo Ke Saro Ko Neezo Per Chadha Kar Kocha E- Bazaar Me Phirane Ka Tamasha Dekhti Rahi.
Hazrath Muslim Bin Aqeel Aur Unke Farzando Ke Shahadat 3 Zil Hijja 60_Hijri Ko Huwi Aur Yahi-O-Tareekh He Ke Hazrath Imam Hussain (RadiyAllahu Ta'Aala Anhu) Hazrath Muslim Ka Khat Padh Kar Apne Ahle-O-Ayal Ke Hamrah Makkah Mukkarram Se Kufa Ko Rawana Hote Hain. Aur Imam Aali Maqam Ko Kuch Bhi Pata Nahi He Ke Waha Hazrath Muslim Per Khat Tehreer Karne Ke Baad Kya Guzri?
0 comments