10vi Muharram 61_San Hijri Jumma Ka Pur Aashub Din Aagaya. Aur Duniya Se Safar Karne Wale  Ghareebul-Watan Musafiro Ne Apni Zindagi Ki Aakhri Namaze Fajar Ada Karli. Idhar Suraj Tulu Huwa Odhar Ibne Sa’Ad Ne Apne 22,000 Lashkar Ko In Gharibaane Be-Watan Ka Khoon Bahane Ke Liye Maidan Me Laakar Jang Ka Naqara Baja Diya  Aur Khud Pehla Teer Chala Kar Jang Ki Ibtida Kar Di Aur Ye Aelaan Kar Diya Ke..
Aye Ahle Sham -O-Iraaq! Gawah Rehna Ke Sabse Pehla Teer MyNe Hi  Jigar Gosha-E- Rasool-O- Farzande Batool Per Chalaya Hai.

Hazrath Imam Ye Manzar Dekh Kar Ghode Per Sawar Ho Kar Itmame Hujjat Ke Liye Maidane Kaarezaar Me Tashreef Laaye  Aur Khoone Naahaq Ka Azab Suna Kar Aur Apne Hasab-O- Nasab Aur Fazail Ka Bayan Karke Sitamgaro Ko Zulm Se Baaz Rakhne Ki Koshish Farmayi . Lekin Hazrath Imam Ka Khutba Abhi Tamam Bhi Nahi Huwa Tha Ke Sitam Shuaaro(N) Ne Shoor-O-Gul Machana Shuru Kar Diya. Aur Kehne Lage Ke Aye Imam Ham Aap Ke Fazail Se Achchi Tarha Waqif Hain. Lekin Is Waqt Ye Maslah Zere Bahas Nahi Hai. Is Waqt Jang Ke Liye Aap Kisi Ko Maidan Me Bhejiye.


Zalimon Ka Ye Gustakhana Jawab Sun Kar Hazrath Imam Apne Kheemah Ki Taraf Rawana Hogaye.
Itne Me Yazeedi LashKar Ka Ek Be-Baak Maalik Bin Urwah Ghoda Kuda Kar Samne Aagaya . Aur Usne Jab Kheeme Ke Gird Aag Dekhi To Intehayi Be-Adbi Ke Sath Ye Kaha Ke
Aye Husain ! Tum Ne Waha Ki Aag Se Pehle Yahi Aag Lagali?

Hazrath Imam Ne Farmaya Ke Aye Dushmane Khuda Tu Jhoota Hai. Kya Tera Ye Gumaan Hai Ke Me Jahannam Me Jaoonga?

Imam Ke Janisaro Me Se Hazrath Muslim Bin Ausaja Ne Intahayi Taish Me Aakar Is Bad-Zuban Ke Muh Per Teer Marne Ki Ijazat Talab Ki. Magar Hazrath Imam Ne Farmaya Ke Nahi..Nahi.. Hamari Taraf Se Hargiz Koyi Jang Ki Ibteda Na Kare. Take Hamare Khoone NaaHaq Ka Pura Pura Wabaal Inhi Zalimo Ki Gardan Per Rahe. Lekin Hazrath Imam Ne Majroh Dil Se Ye Dua Mangi Ke  Khudawanda Tu Is Bad-Naseeb Ko Naare_Dozakh Se Pehle Hi Aag Ke Azaab Me Mubtila Kar. Chunancha Fouran Hi Malik Bin Urwah Ka Ghoda Phisla Aur Ye Is Tarha Gira Ke Ghode Ki Rakaab Me Iska Paon Ulaj Gaya .Aur Ghoda Isko Ghaseet Te Huwe Khandakh Ki Taraf Le Kar Bhaga .Aur Ye Khandhak Ki Aag Me Gir Kar Khak Ka Dher Ho Gaya.

Isi Tarha Ek Aur Darida Dahan Ne Ye Keh Diya Ke
"Aye Husain Tum Ko Rasool-E-Khuda Se Kya Nisbat”?
Is Lafz Se Hazrath Imam Ka Jigar Shaq Ho Gaya Aur Aap Ne Janabe Baari Me Arz Kiya Ke Elaahi Tu Fouran Is Be-Baak Ko Apne Qahar Me Giraftaar Kar.
Chunancha Ek Dam Is Khabees Ko Baitul Khula Ki Hajat Ho Gayi. Aur Ye Nanga Ho Kar Ek Jhadi Me Qazaaye Hajat Ke Liye Betha. Achanak Ek Siyah Zehrile Bichho Ne Isko Dang Mara Aur Ye Dard Se Bil-Bilata Huwa Najast Me Lat Pat Ho Kar Bhaga.Aur Lashkar Ke Samne Tadap Tadap Kar  Zillat-O- Ruswayi Ki Mout Mar Gaya.

Isi Tarha Ek Bad Lagam Muzni Ne Nihayat Gushtakhi Ke Sath Ye Kaha Ke
"Aye Husain Dekhlo Daryaye Faraat Mouje Maar Raha Hai. Magar Tum Ko Usme Se Ek Khatra Bhi Nahi Milega. Aur Tum Pyase Mar Jaoge"
Hazrath Imam Ne Uske Liye Ye Dua Farmayi Ke Aye Allah Isko Pyasa Maar.

Chunancha Ek Dam Muzni Ka Ghoda Bhag Nikla Aur Ye Usko Pakadne Ke Liye Douda To Usper Pyaas Ka Intehayi Ghalba Huwa. Magar Jab Paani Pita Tha To Ek Qatra Bhi Halaq Se Neeche Nahi Utarta Tha. Yahan Tak Ke Pyaas Ki Shiddat Se Tadap Tadap Kar Mar Gaya.

Chahiye To Ye Tha Ke Imam Aali Maqam Ki In Iman Afroz Karamato Ko Dekh Kar Zalimo Ke Sine Me Dil Laraz Jata .Aur Wo Isse Ibrat Pakad Kar Imam Ke Khoone Naa-Haq Se Baaz Aajate.
Magar Ye Shararat Ke Mujassame Jin Ke Saro Per Hirse Duniya Ifriyat Ban Kar Musallat Ho Chuki Thi.
In Ibrat Aaamoz Karaamaat Se Koyi Sabaq Na Le Sake.
Balke Aur Zyada Gustakhi -O- Be-Baaki Ke Shaitane Mujassam Ban Kar Rajz Gaate Huwe Hathyaar Chamka Chamka Kar Hazrath Imam Se Ladne Ke Liye Maidane Jang Me Nikal Aaye.

Lekin Hazrath Imam Aur Inke Jaanisaar Sathi Bhi Inki Kasrat Aur Shaitani Taqat Se Na Dare Na Jhijhke.
Balke Sab Ke Sab Khouf-O-Hiraas Se  Be-Niyaaz Ho Kar Jazbaye Shahadat Se Sar Shaar Aur Khuda Ki Rah Me Apna Sar Katane Ke Liye Be-Qaraar The.
Chunancha Khandaane Ahle_Bait Ke Jawano Aur Haidare Karraar Ke Shero(N) Ne Intehayi Dileri Ke Sath Aage Badh Kar Istarah Daade Shuja'At Dene Ka Azm Kar Liya Ke..


Magar Qurb-O-Jawar Ke Wo Jaani'Saar Jo Is Hadsa Ki Khabar Paa Kar Hazire Darbaar Hogaye The.
Wo Hazrath Imam Ke Qadmo Per Gir Kar Machal Gaye. Aur Arz Kiya Ke Aye Ibne Rasool Allah..Ye Ger-Mumkin Hai Ke Jab Tak Ham'Mese Ek Jaani'Saar Bhi Baqi Hai..Ahle_Baite Nabuwwat Ka Khoon Zameen Per Gir Pade Isliye Pehle Ham Apna Sar Aap Ke Qadmo Per Qurbaan Karenge. Chunancha Yek Ke Baad Digare In Wafa Shuaaro Ne Maidan Jang Me Nikal Kar Aysi Shujaat-O-Jaan-Baazi Ka Muzahira Kiya Ke Dushmano Ke Dilo Per Apni Bahadduri Ka Sikka Bitha Diya.
Yahan Tak Ke Ladte Ladte Ye Tamam Jaani'Saar Rahe Khuda Me Apni Jaane Qurbaan Karke Shahadat Se Sarfaraz Ho Gaye.

In Wafadaar Jaanisaro Ke Naam Aur Inki Jaan Baziyou Sar-Faroshiyo Ke Tazkire Tarreekh Ki Kitabo Me Is Tarha Naqshe Wafa Ban Kar Chamak Rahe Hain Ke Qiyamat Tak Gardishe Lail -O-Nihar Inko Mahu Nahi Kar Sakti. Agar In Jan'Bazo Ka Zikr Shuru Kare To Bahot Taweel Hojayegi.
Lekin, Behre Haal Phir Bhi Inme Se Chand Ba-Wafao(N) Ka Zikr Karenge.