Chunancha Yahi Wajah He Ke In Zalimo Ne Ye Tadbeer Ikhtiyaar Ki Ke In Shere Khuda Ke Sheron Per Paani Band Karke Inhi Pyaas Ki Shiddat Se Nidhaal Kar Diya Jaye.
Aur Jab Ye Bilkul Hi Muz'Mahil(Kamzoor) Aur Ja-Balb Ho Jaye To Inse Jang Shuru Ki Jaye.
Isiliye Ibne Sa’Ad Ne Hukm Dediya Ke Darya Faraat Ka Thanda Thanda Meetha Meetha Paani Yahood-O-Nasara Noush Kar Sakte Hain.
Kuffar-O-Mushrikeen IsSe Seraab Ho Sakte Hain.
Kutte Aur Khinzeer Bhi Pi Sakte Hain.

Magar Saqi -E- Kousar Ke NoU-Nihaal Aur Fatimah Ke Laal Ko Ek Qatra Bhi Na Diya Jaye.

ALLAHU AKBAR..

Teri Qudrat Jaanwar Tak Aab Se Seraab Ho
Pyaas Ki Shiddat Se Tadpe Be-Zabaane Ahle Bait

Kya Tarikhe Islam Ka Ye Qiyamat Numah Saniha Kabhi Bhi Nasle Insani Faramosh Kar Sakti He????
Ke Darya Ke Kinare Saqi-E- Kousar Ke Pyare FatimatuzZahra Ke Aankho Ke Taare Paani Ke Ek Ek Qatre Ke Liye Taraste Aur Tadapte The..

ALLAH ALLAH.... Kitna Hosh Ruba Aur Ruh Farsa Wo Manzar Hoga???
KE Gulshane Fatimah Ka Sabse Nanhha Pauda Doodh Pita Bachha Ali Asgar Maa Ki Goud Main Bhook Pyaas Se Tadap Raha He.
3 Din Ki Bhooki Pyaasi Maa Ke Seene Me Doodh Khushkh Ho Chuka Hai.
Bhooka Pyaasa Bachcha Baar Baar Maa Ke Seene Main Muh Lagata Hai
Magar Jab Use Doodh Ka Ek Qatra Bhi Muyassar Na Hota .... To Wo Kabhi Bilak Bilak Kar Zaar Zaar Rota Hai.
Aur Kabhi Bisoor Bisoor Kar Muh Bigadta Hai.
Kabhi Hairat Se Aankhe Phad Phad Kar Apni Maa Ka Udaas Chehra Dekhta Hai.
Kabhi Maa Ki Goud Me Machal Machal Kar Apni Sukhi Zabaan Apni Khushkh Hoto(N) Per Pherata Hai.
Be-Zuban Bachha Bol Nahi Sakta...
Magar Hairaan He Ke Meri Maa Ke Seene Me Jo Rahmat Ke 2 Chasme The Wo Aaj Kyun Khush Ho Gaye??
Main Pehle Isi Seene Se Muh Lagata Tha To Mera Muh Doodh Se Bhar Jata Tha.
Magar Aaj Kya Hogaya Ke In Doodh Ke Chashmon Se Mujhe Ek Khatra Bhi Doodh Nahi Mil Raha He.?

ALLAH ALLAH........Regestani Maidan,
Chil_Chilati Huwi Dhoop, Garam-Garam Ret, Jhulasti Huwi Lu Ke Thapede
Ali Asgar Sheer Khwar Ke Patle Patle Naram-O-Nazuk Gulabi Hontt Jin Ki Nazakat Per Gulab Ki Nanhi Nanhi Pankhadiya Qubaan Hoti The.
Aaj Is Qiyamat Numa Garmi Ki Shiddat Aur Pyaas Ki Tapish Se Khushkh Ho Kar Kaale Padh Gaye Hain.
Aur Ye Noor Ki Tasweer Pyaas Ki Shiddat Se Ja Balb Hai.
Mamta Ki Maari Dukhyari Maa Jo Khud Bhi Bhook Pyaas Se Muz'Ma'Hil Thi  Apne Is Noore Nazar Ki Be-Qarari Aur  Girya-O-Zaari Ko Dekh Kar Aur Bhi Zyada Be-Taab Hojati Thi  Aur Baar Baar Uske Seene Main Sadmaat Se ShiSha-E- Dil Paash Paash Ho Jata Tha. Magar Sabar-O-Shukra Ke Siwa In Isteqamat Ke Mujassimo Ki Zubaan Per Koyi Dosra Lafz Nahi Aata Tha......ALLAH ALLAH

 WO Jalti Ret Ki Garmi
WO Dhoop Aur Pyaas Ki Shiddat
Kare Sabr-O-Tahammul Meere Kousar Aise Hote Hain