Ye Ameerul Momineen Hazrat Abu Bakr Siddiq RadiAllahuTa'alaAnha Ki Biwi Hain Aur Hazrat Ayesha Aur Hazrat Abdur Rahman Bin Abu Bakr Ki Maa Hain. Inki Shakl O Surat Aur Unki Behtareen Aadaton Aur Khaslaton Ki Bina Per Huzoor Akram ﷺ Farmaya Karte The Ke Duniya Me Agar Kisi Ko Hoor Dekhne Ki Khwahish Ho To Woh Umme Rumaan Ko Dekh Le Ke Woh Jamaal Surat Aur Husn Seerat Me Bilkul Jannat Ki Hoor Jaisi Hai.

Huzoor AlaihisSalatoSalam In Per Bada Khass Karam Farmaya Karte The. 6 Sane Hijri Me Jab Hazrat Umme Rumaan RadiAllahuTa'alaAnha Ka Inteqaal Huwa To Huzoor ﷺ Inki Qabr Me Utre Aur Apne Dast e Mubarak Se Inko Supurd e Khaak Farmaya. Aur Inki Maghfirat Ke Liye Dua Farmayi Aur Ye Irshaad Farmaya Ke Ya Allah.! Umme Rumaan Ne Tere Aur Tere Rasool Ke Sath Jo Behtareen Mamla Kiya Hai Woh Tujh Per Poshida Nahi Hai.
Lihaza Tu Inki Maghfirat Farma.

(Istia'ab Jild:4, Safa 1936)

Tabsira :

Khuda Ki Ibadat Aur Pyare Rasool ﷺ Ki Mohabbat O Ita'at Ki Ba-Doulat Hazrat Umme Rumaan RadiAllahuTa'alaAnha Ko Kitni Azeem Sa'adat Aur Kitni Badi Fazeelat Naseeb Ho Gayi Ke Huzoor E Akram ﷺ Ne Apne Dast Mubarak Se Inko Qabr Me Utara Aur Behtareen Andaaz Se Inki Maghfirat Ke Liye Dua Farmayi Yaqeenan Ye Hazrat Umme Rumaan RadiAllahuTa'alaAnha Ki Bahot Badi Khush Naseebi Hai. Aur Usse Ye Sabaq Milta Hai Ke KhudaWande Kareem Ki Ibadat Aur Rasool Ki Mohabbat O Ita'at Se Deen O Duniya Ki Kitni Badi Badi Nematen Aur Doulaten Milti Hain. KhudaWande Quddus Tamam Musalmaan Mardon Aur Awraton Ko Apni Ibadat Aur Rasool Ki Mohabbat O Ita'at Ki Toufeeq Ata Farmaye.
Aameen Allahumma Aameen